പാതിരാച്ചന്ദ്രന്റെ പാർവ്വണരശ്മിയും
പാലപ്പൂ നൽകുന്നൊരുന്മാദവും
കത്തുന്നൊരുള്ളുമെൻ കരളിൻ കലക്കവും
കട്ടെടുക്കുന്നെന്റെ രാത്രികളെ
നീയെന്മനസ്സാം കടലിന്റെ തീരത്തു്
കോറിവരച്ചിട്ട ചിത്രങ്ങളും
നിന്നുടെ ഗാഡമാമാലിംഗനത്തിന്റെ
ചൂടേകുമെന്നുടെ സ്വപ്നങ്ങളും
തട്ടിയെടുക്കുന്നതെന്നുള്ളിൽ നിന്നെന്റെ
തപ്തമാം ദുസ്വപ്ന ദാഹങ്ങളെ
എന്നുടെ ലക്ഷ്യങ്ങ,ളെന്നുടെ പാതക-
ളെന്നുള്ളിലൂറും കലാപത്തെയും
എന്നുമെന്നുള്ളിലായൂട്ടിയുറക്കു വാ-
നെന്നുമതിനെയൊന്നോമനിക്കാൻ
നീയില്ലയെങ്കിലെ,ന്നാത്മദുഃഖങ്ങളി-
ന്നെന്നെ നിരാശയിലേക്കു താഴ്ത്തും
നീവേണമെൻകൂടെ, നീ വേണമെൻചാരെ
നീവേണമെന്നുടെ കയ്യകലെ
എൻവലംകൈപിടിച്ചേഴു ചുവടുവെ-
ച്ചേഴു പദംപറഞ്ഞെന്റെയാകാൻ…

PC : Flickr - abhiomkar